اقتراحات للي ممكن يتعمل عشان مصر تتقدم

-احتياجنا لحركات اجتماعية قوية بيزيد
- الدولة المركزية الحالية لسة في مرحلة تخبط المفروض منديهاش فرصة انها تنظم نفسها
- حركات شغالة على حقوق و مصالح المهمشين و المظلومين بالأساس
- نقابات و حركات عمالية قوية
- تحالفات مبنية من حركات في الشارع و اخصائيين للضغط على الحكومة المركزية و البرلمان التابع عشان نعمل فرشة من القوانين اللي بتفعل الدستور الحالي
- مكاسب صغيرة تشريعية .. و انتخابية في حالة انتخابات المحليات ... هتبتدي تجمع الناس حوالينا
- وضع تصور للتشريعات و السياسات و هيكلية تنفيذية للنظام اللي المفروض نبقى فيه
- الضغط و السعي في تفعيل التصور ده
- تغيير يبقى جي من الناس
- نضال و تضحيات !

امبارح كنت بتكلم على شوية تحركات مصر اظن محتاجاها في المستقبل القريب عشان يحصل تغيير حقيقي للأحسن في الفترة الجاية
اول الحاجات دي هي :
-احتياجنا لحركات اجتماعية قوية بيزيد
سبب من اسباب النهضة في انجلترا مثلاً ان في عز الثورة الصناعية و بسبب ظروف العمل السيئة .. حركات عمالية ابتدت تظهر .. و كان في نضال طويل و كان ليه ضحايا كتيرة عشان يحسنوا ظروف العمل ... يحددوا ساعات محددة للشغل ... فكرة ال 8 ساعات شغل ظهرت بسبب الحركات دي ... التأمينات .... الحد الأدنى للأجور ظهرت بسبب نضال الحركات دي .... اتبنى عليها فكرة النقابات العمالية ... و ظهر بعد مدة كمان حزب العمال اللي مسك الحكم في المملكة المتحدة فترات كبيرة .
حركات اجتماعية مختلفة ظهرت في بلاد مختلفة و مش شرط كمان انها تبقى حركات يسارية التوجه .. كان حركات اجتماعية مبنية على فكرة ظلم قائم و بيحاولوا يزيلوه .. زي حركة امهات ساحة مايو الأرجنتينية ... اللي كانت مهتمة بالبحث عن المختفيين قسرياً .. الظاهرة اللي كانت منتشرة في العهد الدكتاتوري للأرجنتين .. و الحركات و النقابات العمالية في البرازيل .. اللي طلعت لولا دا سيلفا الراجل الفقير اللي مكملش تعليمه ... و اللي كان شغال في مصانع الحديد و اللي كان سبب رئيسي في نهضة دولة البرازيل ( من اكبر 20 اقتصاد في العالم ) .... و غيرها من الحركات الإجتماعية اللي ابتدت في الأول على حق معين او بتحارب ظلم واقع على المجتمع ... و في منها اللي تطور و بقى حزب و مسك الحكم و منها اللي ساعد في التغييرر و التنمية .